Хонанда Лола Йўлдошеванинг шов-шувларга сабаб бўлган қизил либоси кимошди савдосида сотилади. Бу ҳақда хонанданинг ўзи RedPen нашрига берган интервьюсида маълум қилди.
Нашр мухбирининг: «Шов-шувларга сабаб бўлган қизил либос билан боғлиқ воқеалардан ижобий хулоса чиқариб олдингизми?», — деган саволига, хонанда: «Қизил латта ролини ўйнаган кўйлакни айтяпсизми?», — деб жавоб берган.
«Шкафда турибди. Айтганча, кимошди савдоларини уюштириш ва машҳурларнинг буюмларини сотиш билан шуғулланувчи бир ташкилот яқинда мен билан алоқага чиқди. Олинглар, дедим. Савдодан тушган пул хайрияга сарфланади. Балки шунда ундан бирор фойда чиқар», — деди Лола.
«Аслида бу либосни катта завқ билан кийгандим. Саҳнага нимаики кийиб чиқаётган бўлсам, уларнинг бари образ. Асло фитна ё иғво эмас, аксинча, ўйнашга ҳозирлик кўраётган ролимни тўлдирувчи номернинг бир қисми, холос», — деди хонанда.
Маълумот учун, хонанда Райҳоннинг 2015 йил февралида бўлиб ўтган концертида хонанда Лола томонидан кийиб чиқилган либос шов-шувларга сабаб бўлганди. Март ойида Лола Йўлдошева «Ўзбекнаво» эстрада бирлашмасига «миллий менталитетга зид» либосларни бошқа киймасликка ваъда бергани маълум бўлди. Июль ойида «Ўзбекнаво» хонанданинг лицензиясини тугатганини эълон қилди ва изоҳ берди.