Туркия Россия Су-24 самолёти уриб туширилганидан сўнг жорий этган санкцияларни қайта кўриб чиқишни мақсадга мувофиқ деб билади. Мамлакат ташқи ишлар вазири Мевлют Чавушўғлу Россия президенти Владимир Путин томонидан имзоланган Туркияга нисбатан санкциялар жорий этиш тўғрисидаги фармонга шундай изоҳ берди, дея маълум қилди «Газета.ru».
«Мамлакатларимиз манфаати ва уларнинг келажагини инобатга олган ҳолда мазкур чораларни кўриб чиқиш ва зудлик билан бекор қилиш лозим деб ҳисоблаймиз. Иқтисодиёт ва савдо икки томонлама муносабатларимизда алоҳида ўрин эгаллаб келган. Содир бўлган қайғули ҳодиса туфайли кўп йиллик уринишлар натижасида мустаҳкам асосга эга бўлган муносабатларимизга путур етказилишини нотўғри деб ҳисоблаймиз. Бунинг салбий оқибатларини россияликлар бизнинг халқимиздан кам сезмайди», —дея таъкидлаган вазир.
Эслатиб ўтамиз, олдинроқ Чавушўғлу россиялик ҳамкасби Лавров билан учрашув юзага келган можарони ҳал эта олмаганлигини билдириб, Анқара ҳозирча Россияга нисбатан жавоб санкциялари жорий этишни режалаштирмаётганлигини маълум қилганди.