2015 йил августида бутун дунё ОАВлари Суриядан Байрутга келиб, яшаш учун пул топишга интилаётган фаластинлик қочоқ — Абдулла Ҳалим ал Аттор ҳикоясини ёзган эди. Орадан тўрт ой ўтиб, краудфандинг кампанияси шарофати билан ал Аттор каттагина пулга эга бўлди ва ўз бизнесини очиб, яна 16 қочоқни ҳам иш билан таъминлашга муваффақ бўлди. Бу ҳақда Meduza хабар бермоқда.

Абдул Ҳалим ал Аттор норвегиялик дастурчи Twitter’ига жойлаган сурат туфайли машҳур бўлиб кетди, унда ал Аттор елкасига бош қўйганича ухлаб қолган қизини кўтариб юриб, ручка сотаётгани акс этган эди. Дастурчи Twitter’нинг бошқа фойдаланувчилари берган ғояга кўра, @Buy_Pens аккаунтини очди ва Indiegogo’да краудфандинг кампаниясини ишга туширди. Эълон қилинган сумма — беш минг доллар бир соат ичидаёқ йиғилди. Уч ойда эса маблағ 191 минг долларга етди. Бироқ баъзи муаммолар туфайли, пул ал Атторга бўлиб-бўлиб жўнатилмоқда, ҳозиргача унинг 40 фоизи Байрутга етказилган.

25 минг долларни Абдул Ҳалим ал Аттор Суриядаги дўст ва қариндошларига жўнатди, қолганига ўз бизнесини очишга қарор қилди. Октябрда у ўз новвойхонасини очди, кўп ўтмай, у ерда шаурма растаси ва кичик ресторан ҳам пайдо бўлди. Бундан ташқари, у икки фарзанди билан бошқа уйга кўчиб ўтди, тўққиз ёшли ўғли мактабда ўқишини давом эттира бошлади.

Пулни етказишдаги қийинчиликларга қарамасдан, ал Аттор кўмак учун миннатдор. Унинг дўкончаси даромад келтиришни бошлади. Норвегиялик дастурчи Абдул Ҳалим учун хурсанд, бироқ бундай кампанияларни бошқа ташкил қилмоқчи эмас. Унинг сўзларига кўра, қочоққа пулни жўнатишда юзага келган муаммолар уни жуда хафа қилган.