Приморье ўлкасида Амур лақабли йўлбарс ва эчки Тимур ўртасидаги ноодатий дўстлик атрофидаги воқеалар ривожи қизиқарли тус олмоқда. Бу ҳақда «Йод» хабар бермоқда.
Йўлбарс ва эчки бир ҳафта бирга яшаганидан сўнг, йиртқич ўзига озуқа сифатида берилган жониворни емаслиги очиқ кўриниб қолди. Қизиқ томони, эчки йўлбарснинг уясини эгаллаб олиб, йиртқични томда ухлашга мажбур қилди. Бу ҳолат бир неча кун давом этганидан сўнг, сафари-парк раҳбарияти 29 ноябрь, якшанба куни «дўстлар»ни ажратишга қарор қилди.
Ҳайвонот боғи сайтида берилган хабарга кўра, тунни Амур ва Тимур алоҳида қафасларда ўтказган. «Энди уларнинг ҳар бири ўз ошхонаси ва бошпанасига эга. Тонгда уларнинг иккисини умумий майдонга чиқардик. Биринчи бўлиб Амур чиқди ва Тимурни кутди, улар бирга ўз мулкларини кўздан кечириб чиқишди. Дўстлар аввалгидек қадрдон ва ажралмас», — дейилади хабарда.
Аммо дўстидан ажратиб қўйишганидан сўнг, йўлбарс ўкиришни бошлаган. Боғ ходимларининг қайд этишича, йўлбарс авваллари ҳам ўкириб турарди, бироқ Тимур билан танишганидан сўнг бу одатини ташлаганди.
Йўлбарс Амур ва эчки Тимур 26 ноябрь, пайшанба куни машҳур бўлиб кетди. Маълум бўлишича, йўлбарс унга озуқа сифатида берилган эчкини, эчки йўлбарсдан қўрқмагани сабаб, тановул қилишдан бош тортган. Боз устига, «ўлжа» йиртқичнинг уясини эгаллаб олган, йўлбарс тунни томда ўтказишга мажбур бўлган. Шундан сўнг ҳайвонот боғи меҳмонлари парк раҳбариятидан жониворларни алоҳида-алоҳида волерларга жойлаштиришни сўради. Йўлбарс эса ўзининг янги дўстини ҳимоя қилиб, боғ ходимларига тажовузлик билан муносабатда бўлишни бошлади.
Изоҳ (0)