Қирғизистон президенти аппаратининг собиқ раҳбари уч йиллик қамоқ жазосига ҳукм қилинди

Қирғизистон президенти аппаратининг собиқ раҳбари Данияр Наримбаев суд томонидан уч йилик қамоқ жазосига ҳукм қилинди. Бу ҳақда «ТАСС» хабар бермоқда.

«Наримбаев Бишкекнинг Первомайский тумани суди томонидан ‘Фирибгарлик’ моддаси бўйича айбдор деб топилди. Суд, шунингдек, унинг мол-мулкини мусодара этиш ҳақида қарор қабул қилди. Наримбаев кучайтирилган тартибдаги колонияда жазони ўтайди. Бу жиноий ишнинг яна бир қатнашчиси — мамлакат парламентининг собиқ депутати Хажимурат Коркмазов шу модда бўйича 1,5 йиллик қамоқ жазосига ҳукм этилган. Унинг ҳам мол-мулки мусодара этилади ва жазони кучайтирилган тартибдаги колонияда ўтайди», — дея маълум қилинган республика Олий суди канцеляриясида.

Наримбаев тергов остида бўлган Бишкек шаҳрининг собиқ мэри Нариман Тюлеев яқинларидан 100 минг доллар таъма қилишда айбланиб, июль ойида ҳибсга олинганди. Тергов тахминига кўра, у ушбу сумма эвазига пойтахтнинг собиқ раҳбари учун ижобий суд қарори чиқарилишини ваъда қилган. Наримбаев қамоққа олинишидан бир неча кун аввал Тюлеевнинг қариндошларидан катта миқдорда маблағ олаётган чоғида Коркмазов қўлга тушади. Депутат пулларни президент аппарати раҳбарига бериш учун олганини маълум қилади.

Наримбаев ва Коркмазовнинг адвокатлари айблов далилларини етарли эмас деб ҳисобламоқда ва юқори суд идорасига апелляция беришга ҳозирлик кўрмоқда.