Тошкент мода ҳафталиги ўз ишини бошлади, дея хабар бермоқда My Day. 24 ноябрь куни Ёшлар ижод саройида ҳафталикни стилист ва визажистлар Республика кўрик-танлови очиб берди. Унда ўз ижод ишлари билан мутахассис стилист ва визажистлар иштирок этди.
Стилист ва визажистлар Республика танлови аёллар тўй турмаклари, куёв образини яратиш, келин образини яратиш, соч ўриш элементларига эга миллий турмаклар, ускуна (машинка) ёрдамида салон турмаги, замонавий хонанда аёл образини яратиш каби олтита йўналишда ўтказилди.
Ҳар бир номинация 2 та босқичда ўтказилди ва ишлар ҳакамлар ҳайъати ҳукмига тақдим этилди. Иштирокчиларнинг ишлари саҳнада намойиш этилди ва унинг якунида энг яхши иштирокчилар дипломлар билан тақдирланди.
Биринчиликни, визажистлардан Безрукова Любовь ва Аграманян Кариналар қўлга киритди, аёллар турмаги бўйича энг юқори балл эгаси Руслан Тожиев бўлди. Шунингдек, Андреева Ирен, Абдукаримова Залина, Ҳамроқулова Нигора ва хоразмлик иштирокчи Нурматов Бобур ҳам биринчи ўринни эгаллади.
Эркаклар соч турмаги бўйича эса биринчи ўринларни Акрамов Садирбек, Ёқубов Ҳусан, Ўринбоев Салимбой, Олимжонов Суннат, Олимов Ҳафиз, Ҳайдаров Мирсаид, Одилов Ойбек, Раҳмонов Раҳимхўжа эгаллади. Шунингдек, ушбу танловнинг энг ёш иштирокчиси, 16 ёшли Албаева Диана аёллар соч турмаги бўйича 2-ўринни эгаллади.
Изоҳ (0)