Тошкент шаҳри Мирзо Улуғбек тумани Қорасувбўйи кўчасида жойлашган «Авайхон» жомеъ масжидининг қайта қурилишдан кейинги очилиши 6 ноябрь, жума куни бўлиб ўтди. Бу ҳақда Ўзбекистон мусулмонлари идораси Тошкент шаҳар вакиллиги матбуот хизмати хабар бермоқда.
ЎМИ ахборотига кўра, узунлиги 23 метр, эни 16 метрни ташкил этиб, бир вақтнинг ўзида 700 дан зиёд намозхонларни сиғдира оладиган масжид биносининг қурилиши 2014 йил 17 июнь куни бошланган эди.
Қурилиш бошланишида Ўзбекистон мусулмонлари идораси раиси, муфтий Усмонхон Алимов ташриф буюриб, хонақоҳнинг биринчи ғиштини қўйиб берган эди.
Ҳозирга келиб ҳомийлар, маҳалла фаоллари томонидан масжиднинг хонақоҳ, қўшимча хоналар, айвон, дарвозахона ва таҳоратхона тўлиқ қуриб битказилди.
«Масжидни очилиш маросимига ЎМИ раиси, муфтий Усмонхон Алимов ташриф буюрди ва жума намозини ўқиб берди. Муфтий ҳазратлари ўз маърузаларида масжид аҳлининг янги масжид биноси билан муборак этди», — дейилади ЎМИ ахборотида.
Изоҳ (0)