АҚШнинг Детройт шаҳри черковларидан биридаги ибодат маросими чоғида америкалик пастор унга ҳужум қилган эркакни отиб ўлдирди. Бу ҳақда хабар қилган Detroit News руҳоний ва унга ташланган шахс аввалдан таниш бўлганини таъкидламоқда.
Полиция вакилларининг маълум қилишича, гумонланувчи черковга қўлида ғишт билан кирган ва пасторга дағдаға қилган. 25 ёшли Динти Смит олдинлари ҳам черковга ғишт кўтариб келган ва руҳоний унинг бу хатти-ҳаракатлари устидан полицияга шикоят қилган.
Пастор Смитга бир неча бор ўқ узгани айтилмоқда. Шундан сўнг у жароҳатланган эркакка биринчи ёрдам кўрсатишга уринган, аммо бундан наф чиқмаган: Смит касалхонага етказилганида шифокорлар унинг ўлганини қайд этган.
Руҳоний полиция томонидан сўроқ қилингач, айблов эълон қилинмай қўйиб юборилди. Нашрнинг билдиришича, Смит ҳодисадан бир неча ҳафта аввал ижтимоий тармоқларда хотини унга хиёнат қилгани ва пастор билан иккови фарзанд кутаётганини ёзган. Тергов айни пайтда бу маълумотни ҳам ўрганмоқда.
Изоҳ (0)