Мобил алоқа хизматларининг қониқарсиз ҳолати юзасидан мобил алоқа операторларига тегишли кўрсатмалар берилди

Алоқа, ахборотлаштириш ва телекоммуникация технологиялари соҳасида назорат бўйича давлат инспекцияси (Инспекция) «Электромагнит мослашув маркази» ДУК билан ҳамкорликда ўтказилган радиомониторинг ҳамда операторлар томонидан тақдим этиладиган тармоқ сифат кўрсаткичлари тўғрисидаги ойлик ҳисоботларни ва таянч станцияларнинг тўхталишлари бўйича маълумотлар, шунингдек, келиб тушган мурожаатлар таҳлили натижаларига кўра бир қатор камчиликлар аниқланди ҳамда уларни бартараф этиш борасида тегишли кўрсатмалар берилди. Бу ҳақда «Infocom.uz» хабар бермоқда.

Олиб борилган таҳлил натижаларига кўра, мобил алоқа хизматлари сифат кўрсаткичларининг белгиланган меъёрларга мувофиқ эмаслиги, абонентларга мобил алоқа хизматларидан туну-кун фойдаланиш имконияти яратилмаганлиги, аҳоли кам истиқомат қиладиган ҳудудларни мобил алоқа билан тўлиқ қамраб олинмаганлиги, бу эса, ўз навбатида, ушбу ҳудудларда истиқомат қиладиган аҳоли томонидан бўладиган мурожаатларнинг сонини кўпайишига олиб келаётганлиги аниқланган.

«Инспекция, юқоридаги камчиликларга йўл қўйган COSCOM МЧЖ ХК (Ucell савдо белгиси), Unitel МЧЖ (Beeline савдо белгиси), RWC МЧЖ ХК (Perfectum савдо белгиси) ва ‘Ўзбектелеком’ АК (UzMobile савдо белгиси) мобил алоқа операторларига Ўзбекистон Республикасининг амалдаги қонун ва меъёрий ҳужжатлари талабларига мувофиқ мобил алоқа хизматини кўрсатилишини таъминлашлари юзасидан кўрсатмалар тақдим этди», дейилади хабарда.