Россия президенти Владимир Путин 7 октябрь, таваллуд кунида Сочидаги «Шайба» муз саройида Тунги хоккей лигаси (ТХЛ) янги мавсуми очилишига бағишланган гала-ўйинда иштирок этди. Бу ҳақда «ТАСС» хабар бермоқда.
Путин муз майдонига унинг учун анъанавий бўлиб қолган 11-рақам остида чиқди. У Вячеслав Фетисов, Алексей Касатонов, Павел Буре, Валерий Каменский, Александр Могилний, Алексей Жамнов, Сергей Макаров, таниқли мураббий, лига президенти Александр Якушев каби афсонавий спортчилардан иборат «ТХЛ юлдузлари» жамоаси таркибида иштирок этди. «Юлдузлар»га Россия мудофаа вазири Сергей Шойгу, Татаристон раҳбари Рустам Минниханов, Москва вилояти губернатори Андрей Воробев, Борис ва Аркадий Ротенберг, Геннадий Тимченко каби ҳокимият тизимлари ҳамда бизнес вакилларидан тузилган «ТХЛ терма жамоаси» қарши чиқди.
Муз саройи томошабинлар билан деярли тўлди. Улардан бири Россия президентини 63 ёшга тўлганини қутлаш мақсадида «Туғилган кунингиз билан, жаноб Путин!» сўзлари ёзилган плакатни (негадир инглиз тилида) кўтариб олгани айтилмоқда.
Эслатиб ўтамиз, ТХЛ Путин ташаббуси билан ўз фаолиятини бошлаган. Лига асосий ишидан бўш пайтларида, кўпинча кечки пайт (номланиши ҳам шундан келиб чиққан) ўйин учун вақт ажратадиган хоккей ишқибозларини бирлаштирган. Лиганинг биринчи гала-ўйини 2012 йил 7 май куни, Путиннинг Кремлдаги президентлик инаугурациясидан сўнг бўлиб ўтганди.
Изоҳ (0)