Санкт-Петербург ва Ленинград вилояти арбитраж суди ижтимоий тармоқда фонограммаларни тарқатгани учун «ВKонтакте»дан компенсация талаб этаётган Universal Music ҳамда Warner Music овоз ёзиш компаниялари даъвосини рад этди. Суд ижтимоий тармоқни «мусиқали ёзувлардан фойда олишни кўзламайдиган ахборот воситачиси» дея тан олган. Бу ҳақда Meduza хабар бермоқда.
Warner Music ва Universal Music, шунингдек, Sony Music 2014 йил баҳорида муаллифлик ҳуқуқларини бузишда айблаб, ижтимоий тармоқни судга берган ҳамда кўрилган зиённи қоплаш учун компенсация сифатида 50 миллион рублдан зиёд маблағ тўлашни талаб қилган.
Шу йил июль ойида Sony Music «ВKонтакте» билан келишув имзолагани, мазкур келишув ҳуқуқ эгаларига тўловлар кафолати ҳамда фойдани икки томон ўртасида бўлинишини кўзда тутиши ҳақида хабар берилган эди.
Warner Music ва Universal Music компанияларининг Россиядаги вакиллари суд қарори юзасидан ҳозирча изоҳ бермаган.
Изоҳ (0)