Россиянинг 25 та сайёҳлик компанияси «Ипак йўлида туризм 2015» XXI Тошкент халқаро сайёҳлик ярмаркасида қатнашмоқда. «РИА Новости» хабарига кўра, Россия мазкур тадбирда илк бор фахрий меҳмон сифатида иштирок этмоқда.
«Ўзбектуризм» миллий компаниясидан маълум қилишларича, Россия компаниялари 6 октябрь, сешанба куни махсус «Профессионал харидор» дастури доирасида қатнашиб, Ўзбекистон тур-операторлари билан b2b (business to business) форматида учрашувлар ўтказган. Умуман, ярмаркада 25 мамлакатнинг 400 дан ортиқ фирма ва компаниялари қатнашмоқда.
Россия расмий маълумотларига кўра, сўнгги вақтларда инқирозли ҳолатлар сабаб Россия ва Ўзбекистон ўртасидаги сайёҳлик оқими бироз сустлашган бўлса-да, умуман олганда, барқарорлик мавжуд. «Ростуризм» маълумотларига кўра, 2014 йили Ўзбекистондан Россияга 2,5 миллионта сафар амалга оширилган бўлса, Россиядан Ўзбекистонга 127 минг марта саёҳат қилинган.
Ҳозирги вақтда Ўзбекистонда турли давр ва цивилизацияларга оид 7 мингдан ортиқ ёдгорликлар мавжуд. Жаҳон туризм ва саёҳатлар кенгаши Ўзбекистонни «сайёҳлик портлаши» юз бериши кутилаётган беш мамлакатнинг бири сифатида эътироф этган.
Ўзбекистонда туризмнинг ўсиши кейинги ўн йилда йилига 6,2 фоизни ташкил этади. 2014 йили Ўзбекистонга 1,938 миллиондан ортиқ чет эл мамлакатлари фуқаролари ташриф буюрди, бу бир йил аввалги кўрсаткич — 2,028 миллиондан 4,5 фоизга кам. Қайд этиш жоиз, 2013 йилги натижа 1997 йилдан бери кузатилган энг юқори кўрсаткичдир.
Изоҳ (0)