Mashable порталининг хабар беришича, 2015 йил давомида селфига тушиш вақтида ҳалок бўлганлар сони акулалар ҳужуми натижасида қурбон бўлганлар сонидан кўпроқ бўлди. Биргина инглиз тилидаги нашрларда фотосуратга тушиш натижасида ҳалок бўлганлар ҳақидаги хабарлар денгиз йиртқичлари ҳужуми натижасида ўлим топганлар тўғрисидаги ахборотлардан кўпроқ бўлган.
Акулаларнинг одамларга ҳужуми билан боғлиқ барча ҳодисалар ҳақидаги хабарларни тўплаб борувчи sharkattacksurvivors.com портали маълумотларига кўра, 2015 йили акулаларнинг жағлари бутун жаҳон бўйлаб жами саккиз кишининг ҳаётига зомин бўлган.
Айни вақтда, Mashable портали инглиз тилидаги матбуотда селфига тушиш натижасида вафот этганлар билан боғлиқ камида 12 ҳодисани аниқлаган. Ғарб матбуотидаги сўнгги йирик шов-шоув 18 сентябрь куни қайд этилган — шу куни 66 ёшли япониялик сайёҳ дўсти билан бирга Тож-Маҳалда суратга тушиш вақтида ҳалок бўлганди.
Бироқ, TJ’нинг қайд этишича, мазкур маълумотларни тўлиқ деб бўлмайди. 5 июль куни Россия нашрлари 2015 йилда жаҳон бўйлаб «селфидан» камида 50 киши ҳалок бўлгани ҳақида хабар берганди. 28 август куни «РИА Новости» агентлиги биргина Россиянинг ўзида 2015 йил бошидан бери автопортрет олиш билан боғлиқ 100 га яқин бахтсиз ҳодиса қайд этилгани, уларнинг «бир неча ўнтасида» одамлар ҳалок бўлгани ҳақида ёзганди.
Бу борадаги статистикани юритишнинг мураккаблиги шундаки, ОАВ ҳодисага билвосита алоқадор бўлган ёки умуман алоқадор бўлмаган вазиятларни ҳам селфига тушиш билан боғлашга уринади. Масалан, 10 июль куни «Москва-Сити» мажмуасидаги осмонўпар бинодан қулаш оқибатида ҳалок бўлган қизнинг қариндошлари унинг «селфи натижасида ҳалок бўлгани» ҳақидаги гап-сўзлар россиялик журналистларнинг уйдирмаси эканлигини маълум қилганди.
Шунга қарамай, «селфидан ўлиш»нинг глобал статистикасига қараб, уни жиддий муаммо деб ҳисоблаб бўлмайди. Биргина АҚШнинг ўзида 2015 йил давомида бахтсиз ҳодисалар натижасида 90 мингга яқин одам, яшин уришидан 59 киши, дарахт ағанашидан 108 киши, ётоқда сигарет чекиш оқибатида эса 565 киши ҳалок бўлган.
Изоҳ (0)