АҚШнинг Лас-Вегас шаҳрида ўтказилаётган жаҳон чемпионатида яна бир ўзбекистонлик спортчи кумуш медаль совриндори бўлди, деб хабар қилади Ўзбекистон Миллий олимпия қўмитаси матбуот хизмати.
Эркин кураш бўйича вазни 65 килограммгача бўлган полвонлар баҳсида Ўзбекистон шарафини муносиб ҳимоя қилаётган Ихтиёр Наврўзов 1/16 финалда Намибия, 1/8 финалда Украина, чорак финалда Мўғулистон, ярим финал беллашувида эса 2014 йилги Жаҳон чемпиони Сослан Рамоновни мағлуб этиб, финалга чиқди. Ҳал қилувчи баҳсда италиялик Фрэнк Чамизо Маркес билан баҳс юритган Наврўзов 3:4 ҳисобида имкониятни бой берди.
Эслатиб ўтамиз, мазкур жаҳон чемпионатининг юнон-рум кураши бўйича 85 килограммгача бўлган полвонлар беллашувида ўзбекистонлик Рустам Ассакалов ҳам кумуш медали билан тақдирланган эди.
Рустам Ассакалов ва Ихтиёр Наврўзов 2016 йили Рио-де-Жанейро шаҳри (Бразилия)да ўтказиладиган Олимпиада ўйинлари йўлланмасини қўлга киритди.
Изоҳ (0)