Тошкентнинг шимоли-шарқида пойтахтнинг иккита серқатнов Боғишамол ва Мирзо Улуғбек кўчаларини туташтирадиган йўл участкаси қурилиши авж паллага кирган, деб ёзади «Газета.uz».
Узунлиги 1,6 километр бўлган янги автомобиль йўли илгари Кабель заводига тақалган йўлнинг давоми бўлади. Энди у заводнинг қоқ ўртасидан кесиб ўтиб, Чаманбоғ кичик кўчаси бўйлаб, Ботаника боғи ёнидан ўтади ва Боғишамол кўчасига чиқади.
Автомагистрални «Ўзавтойўл» компаниясининг Тошкент Кўприк хўжалигини сақлашга ихтисослаштирилган таъмирлаш-фойдаланиш корхонаси (КХСИTФК) қурмоқда. Қурилиш ишлари 1 августда бошланди, йўл қурувчилари объектни сентябрь ойида фойдаланишга топширишни мўлжалламоқда.
Олти қатордан иборат автомобиль йўли четларида янги пиёдалар йўлаклари, унинг ёнларидаги уйларда яшовчи аҳоли автомашиналари учун кириш жойлари, шунингдек, кўкаламзор қаторлар бўлади.
Иккита йўловчи транспорти бекатини қуриш кўзда тутилган. Кичик пудратчи «Паркент сувқурилиш» компанияси Салар канали устидан эни 41 м бўлган кўприк йўл қуриб берди.
«Автомобиль йўлининг янги қисми фойдаланишга топширилиши билан шаҳар туманлари ўртасидаги масофа анча қисқаради. Ботаника боғи ва Кабель заводининг умумий майдони жуда катта бўлгани боис илгари улар айланиб ўтилар эди», — деди Тошкент КХСИTФК директори А. Иззатуллаев.
Йўл қурилиши билан бирга унга туташ бўлган Салар канали тозаланмоқда ва унинг қирғоқлари мустаҳкамланмоқда.
Изоҳ (0)