Мустақиллик байрами арафасида «Мен сени севаман, Ўзбекистон» номли ижтимоий акция ўтказилмоқда

Ўзбекистон мустақиллиги арафасида ижтимоий тармоқларда «Мен сени севаман, Ўзбекистон» (I Love Uzbekistan) номли ижтимоий акция ўтказилмоқда. Флешмоб ўтказиш ташаббусини ҳуқуқшунос ва блогер Хушнудбек Худайбердиев ўзининг Facebook’даги саҳифаси орқали эълон қилган.

«Азиз юртдошлар! Келинг, бир кичик ижтимоий акция, аниқроғи флешмоб ўтказиб кўрамиз. Интернетда кўплаб флешмоблар ўтказилган. Кимлардир ўз устидан сув қуйган, кимлардир оёғини осмондан қилиб юрган ва ҳ.к.

Шу ўринда Ватанимиз, Она диёримиз мустақиллигининг 24 йиллик тўйига бағишлаб, кичик ижтимоий акция ўтказсак, ёмон бўлмасди, деб ўйладим. Ижтимоий акция ‘Мен Сени севаман, Ўзбекистон’ (I Love Uzbekistan) деб номланади ва шартлари жуда оддий. Шунчаки, кўкракнинг чап юқори қисмида қўлларимиз билан мажозий маънодаги юракчани акс эттирувчи шаклни ҳосил қилиб расмга тушамиз ва ушбу расмни ижтимоий тармоқдаги профилларимизга (Facebook, Instagram, Twitter ва ҳ.к.) жойлаймиз. Бунда албатта ‪#‎ILoveUzbekistan‬ ҳештегини қўшиб ёзишни унутмаймиз. Ёки кимгадир қулайроқ бўлса, шунчаки ўнг қўлни, чап кўкрагининг устига қўйиб тушса ҳам бўлаверади.

Бундай шаклдаги расмдан катта фалсафий маъно қидириб ўтирманг. Шунчаки, Ватанимизга бўлган муҳаббатимиз бизнинг қалбимизда, юрагимизда эканлигини оддий, содда усулда айтишга ҳаракат қиламиз холос.

Бор-йўғи шу. Ушбу ижтимоий акция юртдошларимиз орасида қай даражада кенг тарқалади, билмадим. Балким кўпчилик бунга жиддий қарамас, балки бемаънилик деб баҳо берар. Лекин ўйлашимча, Ватанимизнинг энг улуғ, энг азиз байрами учун, бир марта шунақа расмга тушсак, фойда бўлса, бўладики, лекин зиён қилмаса керак», — деб ёзади Хушнудбек.

17 августдан бошланган ушбу акцияни ижтимоий тармоқларнинг кўплаб ўзбекистонлик фойдаланувчилари қўллаб-қувватлаб, ўз суратларини жойлаштиришда давом этмоқда.