Қозоғистоннинг Актобе шаҳрида аҳоли валюта айирбошлаш шохобчаларидаги шов-шувларнинг биринчи кунида икки миллион долларга яқин валюта сотди. Бу ҳақда «Tengrinews.kz» хабар бермоқда.
«Биринчи кун фуқаролар банкимизга 1,1 миллион доллар сотди ва бор-йўғи 462 минг доллар сотиб олди. Яъни, биз сотиб олганимиздан кўра 2,5 баробар камроқ валюта сотдик», — деди «КазКоммерсБанк» вакили Дания Еспаева. Шунга ўхшаш ҳолат бошқа банкларда ҳам кузатилган.
Ҳозирги вақтда доллар сотиб олиш ниятида бўлган қозоғистонликларга банк раҳбарлари шошилмасликни тавсия этмоқда. «Курс кескин ўзгарган вақтда одамларнинг қиладиган биринчи иши — ўз тенгеларини долларга айлантиришдир. Бироқ 256 тенге курси бўйича доллар сотиб олганлар ютқазиб бўлди, чунки доллар курси тушиб улгурди. Кейинги 5—7 кун давомида курс барқарор бир ҳолатга келади», — деди Дания Еспаева.
Эслатиб ўтамиз, 20 август куни Қозоғистон ҳукумати мамлакат Миллий банки билан ҳамкорликда тенгенинг эркин курсига ўтиш ҳақида қарор қабул қилди. 21 август куни KASE биржасининг кечки сессиясида доллар курси 237,66 тенгега тенг бўлди.
Изоҳ (0)