Грецияга бир ҳафтада қарийб 21 минг муҳожир келди

Грецияга бир ҳафта ичида қарийб 21 минг муҳожир келди. «Eurointegration.com.ua»нинг қайд этишича, бу кўрсаткич ўтган йили мамлакатга келган муҳожирлар жами сонининг деярли ярмига тенг.

«Сўнгги бир неча ҳафтадан буён муҳожирларнинг келиши тезлиги тинимсиз ўсмоқда. Биргина июль ойида Грецияга 50,2 минг муҳожир келди, бу бутун бир ўтган йилги кўрсаткичдан (43,5 минг) кўп. 8—14 август оралиғида Грецияга денгиз орқали 20,8 минг киши келди, бу 2014 йилги миқдорнинг қарийб ярми», — деди БМТнинг Инсон ҳуқуқлари бўйича олий комиссари бошқармаси раҳбари Уильям Шпиндлер.

Ўтган ҳафта Грецияга келганларнинг аксариятини — қарийб 17 минг кишини сурияликлар, 2,8 минг нафарини афғонлар ва 582 нафарини ироқликлар ташкил этади. Уларнинг аксарияти Грецияга, катта эҳтимол билан, қочоқ мақомини олиш мақсадида сузиб келган. БМТнинг сўнгги маълумотларига кўра, 2015 йил бошидан буён Грецияга келган муҳожирлар сони 160 мингдан ошиб кетган.

Жорий йилда Ўртаер денгизини кечиб ўтган муҳожирларнинг умумий сони 264,5 мингга яқин бўлиб, уларнинг бир қисми, Грециядан ташқари, Италияга (104 минг муҳожир), Испанияга (1,9 минг муҳожир) ва Мальтага (94 нафар муҳожир) йўл олган.