16 август куни Ўзбекистон Миллий кутубхонасида Шарқнинг улуғ алломаси Абу Али Ибн Сино таваллудининг 1035 йиллигига бағишланган «Буюк аллома қомусий олим» номли китоб-расмли кўргазма очилди, дея хабар бермоқда Миллий кутубхона расмий сайти.
Буюк форсий қомусий олим, файласуф, табиб, шоир, мусиқачи ва математигининг илмий мероси бебаҳо. У илмнинг барча соҳаларини: фалсафа, мантиқ, мусиқа, шеърият, тилшунослик, тиббиёт, математика, астрономия, кимё, биология ва геология фанларини қамраб олган.
Абу Али Ибн Сино ҳаёти ва ижодига бағишланган китоб-расмли кўргазмада буюк олимнинг замонамизда нашр этилган машҳур фалсафий қомуси «Китоб аш-шифо», «Тиб қонунлари» тўплами, «Шарқ табобати», «Доривор ўсимликлар рисоласи», «Юрак дорилари рисоласи», «Соғлиқни сақлашга доир рисолалар» китоблари ва Ибн Сино ҳаёти ҳақида ҳикоя қилувчи китоблар ўрин олган. Уларда турли касалликлар белгилари, уларнинг олдини олиш ва даволаш усуллари берилган.
Кўргазмага ташриф буюрган фойдаланувчилар мутафаккир, табиб, устоз ва давлат арбоби мақомини ўзида мужассам қилган инсон ҳақида ва Ўзбекистонда Ибн Синонинг 1035 йиллик таваллуди доирасида ўтказилаётган тадбирлар ҳақида кўпгина қизиқарли маълумотларга эга бўлади.
Изоҳ (0)