ОАВ: Мексика жанубида қийноққа солиш аломатлари бўлган 7 кишининг жасади топилди

Мексика жанубидаги Герреро штатида қийноққа солиш белгилари бўлган етти нафар эркак кишининг жасади топилди, деб хабар беради «РИА Новости».

Ҳодиса гувоҳларининг маълум қилишича, ярим тунда Зитлала кўчаларидан бирида қуролланган номаълум шахслар автомобилдан жасадларни тушириб кетган. Улар 22 июль, чоршанба куни топилган, бироқ ноқулай об-ҳаво шароити туфайли ҳуқуқни муҳофаза қилувчи орган ходимлари пайшанба куни ҳодисани текширишга киришди.

Маҳаллий ОАВнинг маълум қилишича, барча жасадларда қийноққа солиш аломатлари, шунингдек ўқ яралари бўлган. Улардан бирининг боши танасидан жудо қилинган.