Хитойдаги сув тошқинлари оқибатида 900 мингдан зиёд аҳоли жабр кўрди

Хитойнинг Хунан, Фуцзян ва Гуандун вилоятларида кузатилган кучли ёғингарчилик оқибатида сув тошқинлари юз берди. Бу ҳақда «ТАСС» хабар бермоқда.

Ҳодиса натижасида беш киши ҳалок бўлган, яна беш киши бедарак йўқолган, деб гумон қилинмоқда. Хитой марказий телевидениеси ахборотига кўра, табиий офатдан 917,2 минг киши жабр кўрган, 151,4 минг киши эвакуация қилинган.

Сув тошқинлари натижасида 3,2 мингдан ортиқ турар-жой вайрон бўлган, 19,8 минг гектар майдондаги қишлоқ хўжалиги экинларига зарар етган.

Маҳаллий ҳукумат кўчкилар содир бўлиши мумкинлигидан, шунингдек, тўғонлар ва сув омборлари тошиб, бузилиб кетиши эҳтимолидан огоҳлантирмоқда.