Terrafugia компанияси ҳам автомобиль йўлларида ҳаракатлана оладиган, ҳам ҳавога кўтарилиб, уча оладиган TF-X гибрид транспорт воситасининг янги дизайни концепциясини намойиш этди. Бу ҳақда «3Dnews.ru» хабар бермоқда.
TF-X гибрид двигателлар билан таъминланади. Ерда ҳаракатланаётганда, шунингдек, ҳавога кўтарилиш керак бўлганида аккумуляторлардан куч оладиган электр моторлар ишлаб туради. Парвоз вақтида эса 300 от кучига эга ички ёнув двигателлари ишга тушади.
TF-X ҳавода тезликни соатига 320 километргача ошира олади, автомобиль 800 километргача тўхтовсиз парвоз қилиши мумкин. Машина салонида тўрт киши, хусусан, учувчи-ҳайдовчи жой олади.
Мазкур транспорт воситасини ишлаб чиқишда хавфсизлик масалаларига катта эътибор қаратиш режалаштирилмоқда. Хусусан, машина автопилот ва автоматик равишда учиш ва қўниш тизимлари билан таъминланиши кутилмоқда.
Тез орада TF-X’нинг кичиклаштирилган модели Массачусец технологиялар институтининг аэродинамик қувурида ҳар томонлама синовдан ўтказилади. Бироқ унинг кенг омма учун бозорда пайдо бўлиши учун камида 8-12 йил кераклиги айтилмоқда.
Изоҳ (0)