Ўзбекистон Республикаси Вазирлар Маҳкамасининг 2015 йил 14 апрелдаги «Фуқароларнинг Ўзбекистон Республикаси Молия вазирлиги ҳузуридаги бюджетдан ташқари Пенсия жамғармасига ўтказилган суғурта бадаллари тўғрисидаги маълумотларни якка тартибда ҳисобга олишни жорий этиш чора-тадбирлари ҳақида»ги 90-сонли қарорига мувофиқ, суғурта бадаллари тўғрисидаги маълумотларни жисмоний шахслар кесимида ҳудудий давлат солиқ хизмати органларига тақдим этиш тизими йўлга қўйилди. Бу ҳақда Давлат солиқ қўмитаси хабар бермоқда.
Эндиликда суғурта бадаллари тўғрисидаги маълумотларни Ўзбекистон Республикаси Молия вазирлиги ва Давлат солиқ қўмитасининг Адлия вазирлигида 2013 йил 22 мартда 2439-сон билан рўйхатга олинган «Солиқ ҳисоботининг шаклларини тасдиқлаш тўғрисида»ги қарори 10-иловасига мувофиқ, Ягона ижтимоий тўлов ва фуқароларнинг бюджетдан ташқари Пенсия жамғармасига суғурта бадаллари бўйича солиқ ҳисоботига илова қилган ҳолда давлат солиқ хизмати органларига тақдим этилиши лозим бўлади.
Таъкидлаш жоизки, суғурта бадаллари тўғрисидаги маълумотларни жисмоний шахслар кесимида топшириш юзасидан солиқ тўловчиларга енгиллик яратиш мақсадида ҳисобот шаклини икки хил вариантда тўлдириш имконияти яратилди. Биринчиси ходимлар сони 50 нафаргача бўлган юридик шахслар томонидан тўғридан-тўғри hisobot.soliq.uz сайтида турган ҳолда бирма-бир тўлдириш.
Иккинчиси ходимлар сонидан қатъий назар барча юридик шахслар томонидан Excel форматда тайёрланган намунавий файлни юклаган ҳолда ўзлари томонидан олдиндан тайёрланган Excel форматидаги файлдан тасдиқланган шаклга мувофиқ нусха кўчириш йўли билан тўлдирилади.
Изоҳ (0)