ФИФАнинг собиқ вице-президенти гаров пулини 3 та автомобиль ва рафиқасининг никоҳ узуги билан тўлаган
Халқаро футбол федерациясининг собиқ вице-президенти Жеффри Уэбб озодликка чиқиш учун 10 миллион доллар миқдоридаги гаров пулини ўз мулклари ва рафиқаси Кендра Гэмбл-Уэббнинг қимматбаҳо тақинчоқлари ёрдамида тўлаган, деб хабар қилади Associated Press.
Керакли суммани тўплаш учун у Ferrari, Range Rover, Mercedes автомобиллари, 11 та соат, 10 та кўчмас мулк объектларининг ҳужжати, рафиқасининг ҳисобидаги 401 минг доллар ҳамда бир қанча заргарлик буюмларини тақдим этган. Заргарлик буюмлари орасида бриллиант кўзли никоҳ узуги ҳам бор эди.
Эслатиб ўтамиз, ФИФА вице-президенти Жеффри Уэбб 10 миллион доллар гаров пули эвазига озодликка чиққанди. У Бруклиндаги федерал суддан 32 километр нарига узоқлашмаслиги керак. Унинг ҳаракатларини махсус электрон қурилма кузатиб боради. Амалдор унга қўйилаётган айбларни тан олмади.
Жеффри Уэбб 27 май куни Цюрихда ҳибсга олинган амалдорлардан бири ҳисобланади. 16 июль куни у АҚШга экстрадиция қилинганди.
