Дэвис Кубогида Ўзбекистон АҚШ билан ўйнайди

Теннис бўйича норасмий жаҳон чемпионати ҳисобланган Дэвис Кубогининг плей-офф босқичига қуръа ташланди. Унга кўра, Ўзбекистон терма жамоаси лиганинг жаҳон гуруҳига чиқиши учун АҚШ тўсиғидан ўтишига тўғри келади, деб хабар қилади «Olamsport.com».

Эътиборлиси, Ўзбекистон – АҚШ терма жамоалари учрашуви 18—20 сентябрь кунлари Ўзбекистонда ўтказилади. Тез орада Ўзбекистон теннис федерацияси ушбу учрашувнинг қайси шаҳарда ўтказилишини расман эълон қилади. Катта эҳтимол билан учрашув Тошкентда бўлиб ўтади.

Эслатиб ўтамиз, Петр Лебедь бош мураббийлигидаги Ўзбекистон термаси 17—19 июль кунлари Тошкентда Жанубий Корея терма жамоасини 3:2 ҳисобида мағлуб этиб, плей-офф босқичига йўлланма олган эди.