2015 йилнинг 28—31 июль кунлари Япониянинг Isuzu Motors ва Itochu Corporation компаниялари президенти, жаноб Хосои Сусуми бошчилигидаги делегация расмий ташриф билан Ўзбекистонга келади. Бу ҳақда «Ўзавтосаноат» ахборот хизматига таяниб, «Telegraf.uz» хабар бермоқда.
Делегация аъзолари Ўзбекистонга ташрифи давомида «Ўзавтосаноат» АК, хусусан, Самарқанд автомобиль заводи фаолияти билан яқиндан танишиш билан бирга ўзаро ҳамкорлик алоқаларини янги босқичга кўтаришни кўзда тутган.
Япониянинг Isuzu Motors компанияси тижорий транспорт воситалари ва дизель двигателларини ишлаб чиқариш билан шуғулланувчи дунёнинг энг йирик компанияларидан бири ҳисобланади.
Компания заводида 1918 йилдан бошлаб юк автомобилларини ишлаб чиқариш йўлга қўйилди. 1936 йилда компания Япониядаги биринчи дизель двигателини ишлаб чиқарди ва ҳозирги кунда шу хилдаги моторлар учун янги технологияларни яратишда етакчилардан бири ҳисобланади.
Маълумот учун: Тижорий фаолиятини 1999 йилнинг март ойида бошлаган Самарқанд автомобиль заводи 2006 йилда Япониянинг Isuzu Motors Ltd компанияси билан ҳамкорликни йўлга қўйган. 2007 йилнинг январь ойидан бошлаб SamAuto заводининг ишлаб чиқариш қувватларида Isuzu шассиси асосида ҳаракатланувчи тижорий автомобилларни ишлаб чиқариш йўлга қўйилган.
Изоҳ (0)