Освенцим соқчиси 300 мингта қотилликка шерикликда айбланди

Освенцим концентрацион лагерида соқчи бўлиб ишлаган Ҳисобчи лақабли 94 ёшли германиялик Оскар Грёнинг оммавий қотилликларга шерикликда айбдор деб топилди. Уни тўрт йиллик қамоққа маҳкум этишди, дея хабар бермоқда Reuters.

Грёнинг иши бўйича қарор Люнебург шаҳар суди томонидан бир ҳафта эртароқ эълон қилинди. Мажлислар вақти эркакнинг ёши катталигини ҳисобга олган ҳолда қисқартирилган.

Эслатиб ўтамиз, иш кўриб чиқилиши давомида апрель ойида Грёнинг Освенцимнинг собиқ тутқунларидан узр сўраган эди.

Унга қарши 60 дан ошиқ киши даъво берган бўлиб, улар орасида Канада, АҚШ ва Венгрияда яшовчи холокостни бошидан кечирганлар ва уларнинг оила аъзолари бор.

1944 йилда Освенцим (Польша)га венгриялик яҳудийлар ортилган 130 дан зиёд поезд етиб келган эди. 300 мингга яқин киши газ камераларида заҳарланган ва лагерь печларида ёқиб юборилган. Грёнинг ушбу қотилликларда қатнашганликда айбланмоқда. Тергов версиясига кўра, у газ камераларида ўлимга маҳкум бўлганлардан мусодара қилинган буюм ва пулларни сотиш билан шуғулланган.