Американинг New Horizons фазовий қурилмаси 14 июль, сешанба куни Плутонга максимал яқин масофа – 12,5 минг километргача учиб борди. Бу ҳақда «ТАСС» хабар беради.
Қурилманинг вазифаси Плутон сайёраси ва унинг йўлдоши Харон ҳақида иложи борича кўпроқ маълумот тўплаш ҳамда сайёранинг рангли ва оқ-қора суратларини олишдан иборат. Кейин у Харонга максимал яқин масофа – 28,8 минг километргача учиб бориб, уни суратга олади. New Horizons ҳаракатланишда давом этиб, Плутон, кейин эса Хароннинг соясига ўтади. Бу эса унга Плутон атмосфераси ҳақида маълумот тўплаш имкониятини беради.
New Horizons сайёралараро станциясининг Плутон тизимида бўлиш давомида тўплаган маълумотларни узатиши 2017 йилнинг март ойида якунланиши мўлжалланган.
Эслатиб ўтамиз, New Horizons сайёралараро станцияси 8 июль куни Плутоннинг ҳозирги пайтгача олинган энг сифатли суратини узатган эди. Суратнинг пастки ўнг қисмида юрак шаклидаги оқиш доғни кўриш мумкин.