Ўзбекистон ва Эрон терма жамоалар ўртасида кечган ўртоқлик учрашувидан сўнг Миржалол Қосимов матбуот анжуманида иштирок этди, деб хабар беради «Uff.uz».
Эслатиб ўтамиз, учрашувда Ўзбекистон 0:1 ҳисобида Эронга имкониятни бой бериб қўйди.
- Ассалом алайкум. Бундай натижани ўзимиз ҳам кутмаган эдик, — деб сўзини бошлади Миржалол Қосимов. — Аммо биз Шимолий Кореяга қарши кечадиган ўйинга тайёрланмоқдамиз ва бу учрашувдан олдин камчиликларни кўриб олмоқчи эдик. Рақиб жуда кучли, шу сабабли ҳам у билан ўйнадик. Ўйин илк дақиқаларда чиройли бошланмади. Охирги дақиқаларда гол ўтказиб юборганимиз эса мухлисларни ранжитди. Аммо бу учрашув тайёргарлик сифатида қараймиз. Агарда ғалаба керак бўлганида Одил Аҳмедов ва Виталий Денисов сингари етакчи футболчиларни захирага олмаган бўлардик. Бироқ бизга КХДР билан бўладиган ўйинга тайёргарлик муҳимроқ.
- Икром Алибоев ҳақида нима дея оласиз?- Икромнинг илк ўйинида терма жамоа ғалаба қозониши ва бу нарса ёдида қолишини истаган эдик. Аммо насиб қилмаган экан. Икромнинг тўп билан муомаласи, майдонни кўриши, яккакурашларда қўрқмаслиги ва ўзини тортмаслиги қай даражада маҳоратли эканини кўрсатиб турибди. У келажакда ҳам терма жамоага кўп керак бўлади.
- Ўйин вақтини сал кечроққа белгиласак бўлмасмиди? Эрон терма жамоаси бош мураббийининг айтишича, 18.00 да бошлангани уларга қўл келган экан.- Бизнинг КХДР билан ўйинимиз эса соат 17.00 га белгиланган. Шундай экан, биз учун ҳам ўйин вақти эртароққа белгиланиши жуда керак эди. Бу ўйин бизга кўп нарса берди.
- Ўйин темпи у қадар баланд эмас эди. Бунинг сабаби нимада, иссиқми ёки тўрт кундан кейин бўладиган расмий учрашувга куч сақладингизми?- Эрон иккинчи рақам остида ўйнашга ва қарши ҳужумлардан фойдаланишга интилди. Эроннинг сафардаги ўйинлари шундай услубда ўтади. Шу сабабли бир қатор қийинчиликларга дуч келдик. Аммо шуниси билан ҳам ўртоқлик ўйинлари керак. Чунки расмий ўйинда бундан қийинроқ бўлиши турган гап.
- Санжар Шоаҳмедов ҳақида нима дейсиз? Ёшлар терма жамоасида ҳужум чизиғи қизиқарлироқ кўринмоқда. Ўша жамоадан ҳужумчилар чақирсангиз бўлмайдими?- Санжар ҳам Икром Алибоев сингари ўз жамоасида ажралиб турибди. Аммо гап шундаки, майдонга фақат 11 киши тушади. Шунингдек, захира имкониятларидан фойдаланиш ҳам чекланган. Шу сабабли янги футболчиларни синаб кўриш имконимиз кам. Айтайлик, Гадоев ҳам яхши формада, аммо уни бугун майдонга тушира олмадик. Ҳамманинг ўз вақти бор. Шунингдек, ёшлар терма жамоасидаги ҳужумчилар ҳам яхши ўйнамоқда.
Аммо ёшлар ва катталар ўртасида фарқ катта. Улар аввало олимпия терма жамоасига чақирилиб, маҳоратини ошириши керак. Шундан сўнг миллий терма жамоага чақириш мумкин. Аммо ҳозирги ёшлар терма жамоасида яхши футболчилар борлигини кўрдик. Масалан, Достон Ҳамдамов. Бироқ уларни чақиришда шошилмаслик керак. Айтайлик, Темур Ҳакимовни жуда эрта юлдуз қилиб юбордик. Кейин эса шу «юлдуз»га ўзимизнинг ҳам қўлимиз етмай қолди.
- Сиз қайси критерия бўйича ҳужумчиларни чақирмоқдасиз, статистика бўйичами ёки ўйинига қарабми? Масалан, Александр Гейнрих ва Темурхўжа Абдуҳолиқовнинг статистикаси ҳам яхши, уларни чақирсангиз бўлмайдими?- Абдуҳолиқовнинг статистикаси жуда ҳам яхши эмас. Унинг голлари кўп эмас, шунинг учун ҳам чақирмаганмиз. Тушунаман, у «Пахтакор»дан чиққан, шунингдек, хорижда ўйнаганда ҳам шунча вақт ичида ўнтача ўйинда майдонга тушди, шекилли. Яна ҳам аниқ билмадим. Мен фақат охирига қадар курашадиган футболчиларни терма жамоага чақираман. Ҳозир футбол ўйнашни ҳамма ўрганиб олган. Масалан, Филиппин бугун Баҳрайнни мағлубиятга учратди. Шундай экан, бизга фақат охирига қадар курашадиган футболчилар керак. Гуруҳдаги рақиблар жиддий. Айтайлик, ўша Филиппин сафида ҳам бир қатор кучли футболчилар бор.
- КХДР ёпиқ давлат ҳисобланади. Рақибни ўрганиш қандай кечмоқда?- КХДР терма жамоасига қарши кечадиган ўйин олдидан назорат ўйинида рақиб сифатида Эронни танлаганимиз бежизга эмас. Эрон ҳам кореяликлар сингари жисмонан бақувват ва курашувчан футболчиларга эга. КХДР ҳужумчилари ҳам бош билан яхши ўйнайди ва чуқурлаштирилган ҳужум ташкил қилишга уста. Бизнинг мақсадимиз расмий ўйинда ғолиб чиқиш. Шунинг учун бу ўйиндан тайёргарлик сифатида фойдаландик.
Изоҳ (0)