Тошкентда сотиб олиш мумкин бўлган смарт-соатлар билан танишинг

«Mobinfo.uz» нашри Тошкент бозорларидаги «ақлли» соатлар шарҳини тақдим этди.

Apple Watch / Apple Watch Sport

Ўзбекистонда Америка компанияси смарт-соатининг икки хил кўриниши таклиф қилинмоқда, булар Apple Watch ва Apple Watch Sport. Улар бир-биридан қандай материаллардан ясалгани билан фарқ қилади. Техник ва дастурий таъминот жиҳатидан улар бир хилдир.

Хусусан, Sport модификацияси сайқалланган анодланган алюминийдан тайёрланган, Apple Watch’да эса зангламайдиган пўлат қўлланилган. Sport версиясининг дисплейи мустаҳкам ва тобланган Ion-X шишаси билан қопланган бўлса, унинг акаси ёқут шиша билан ҳимояланган.

Шунингдек, Apple Watch жило берилган пўлат корпусга эга, Apple Watch Sport’да эса у шунчаки пластмассадан ясалган.

Тошкентдаги «Флешка» савдо мажмуасида Apple Watch Sport (38 миллиметрли версияси) 3,8 миллион сўмдан сотилмоқда. Чарм тасмали Apple Watch’ни эса 5,6 миллион сўмга харид қилиш мумкин.

Samsung Gear / Gear S / Gear Fit

Пойтахт бозорларида Жанубий Корея компаниясининг Samsung Gear / Gear S «ақлли» соатларини 750 мингдан 820 минг сўмгача, шунингдек Samsung Gear Fit фитнес браслетини 560 минг сўмга харид қилиш мумкин.

Sony Smart Wаtch

Тошкентда айни пайтда Япония компанияси «ақлли» соатларининг уч хил версиясини топиш мумкин. Биринчи авлод Sony Smart Wаtch 800 минг сўм, Sony Smart Wаtch 2 — 850 минг сўм ва янги Sony Smart Wаtch 3 — 1,1 миллион сўмдан сотилмоқда.

Motorola 360

Motorola компаниясининг айлана шаклидаги дисплейга эга Moto 360 соатини 1,4 миллион сўмга харид қилиш мумкин.

Бундан ташқари, савдо нуқталарида Хитой компанияларининг смарт-соатларини ҳам топиш мумкин.

Масалан, суратдаги Хитойнинг нотаниш компаниясига тегишли қурилма ҳар қандай Android-девайсга уланади, унинг ёрдамида қўнғироқларни амалга ошириш мумкин. Ушбу соат 450 минг сўм туради.