Ўзбекистон автомобиль ва дарё транспорти агентлигининг жорий йил биринчи чорагидаги фаолиятига бағишланган матбуот анжумани бўлиб ўтди, деб хабар бермоқда ЎзА.

Истиқлол йилларида Президентимиз раҳнамолигида автотранспорт хизматлари бозорида бозор муносабатларини шакллантириш ва соғлом рақобат муҳитини кучайтириш учун барча зарур шароитлар яратилгани таъкидланди. Транспорт корхоналарининг автопарки мунтазам янгиланаётгани самарасида айни пайтда йўловчи ва юк ташиш тизими янада ривожланмоқда. Шу йилнинг биринчи чорагида автотранспорт корхоналари 98 Isuzu русумли автобус, 99 юк автомобили, 43 янги микроавтобус ва 184 енгил автомобилни лизинг асосида харид қилди.

Агентликдан олинган маълумотларга кўра, жорий йилнинг биринчи чорагида Ўзбекистон Республикаси Ички ишлар вазирлигининг Йўл ҳаракати хавфсизлиги бош бошқармаси ва Давлат солиқ қўмитаси билан ҳамкорликда транспортда ташиш соҳасида ноқонуний фаолият юритаётган субъектларни аниқлаш бўйича рейдлар ўтказилган. Ҳисобот даврида эса 1130 қўшма рейд ташкил қилиниб, текширувлар давомида тўпланган барча материаллар чора кўриш учун тегишли идораларга тақдим этилган.

Агентлик «Кексаларни эъзозлаш йили» Давлат дастури доирасида ҳам катта ишларни амалга ошираётгани қайд этилди. Бу борада тасдиқланган режа асосида уруш фахрийлари, ёлғиз, кекса фуқаролар, кўп болали ва кам таъминланган оилаларга моддий ҳамда маънавий ёрдам кўрсатилаётир. Жумладан, Наврўз байрами муносабати билан автотранспорт соҳаси фахрийлари иштирокида ўтказилган тадбирда уларга моддий ва маънавий ёрдам кўрсатилди.

Бундан ташқари, кичик бизнес субъектлари раҳбарлари, мутахассислар, хусусий тадбиркорлар малакасини ошириш, уларга маслаҳат ёрдами кўрсатиш бўйича тизимли ишлар амалга оширилмоқда.

Тадбирда журналистларни қизиқтирган саволларга атрофлича жавоб қайтарилди.