Савицкий номидаги давлат музейи Гёте-институтининг Тошкентдаги ваколатхонаси ҳамда «OXUS Culture» ташкилоти билан ҳамкорликда мактаб ўқувчилари учун «Менинг севимли музейим» номли иншолар танловини эълон қилди. Бу ҳақда танлов ташкилотчилари «Дарё»га маълум қилди.

Танловда Қорақалпоғистоннинг 6−9-синф ўқувчилари иштирок этади. Ижодий ишлар танлов номига мос бўлиши шарт. Энг яхши иншолар Гёте-институти, Савицкий номидаги музей расмий интернет саҳифаси ва «Жеткеншек» газетасида эълон қилинади.

Танловнинг мақсади музей фаолиятига ўқувчиларни жалб этиш, тарих, маданият ва санъатга қизиқишни тарбиялаш, она ватанга муҳаббат уйғотиш ва музей фаолиятини оммавийлаштириш, ўсиб келаётган авлоднинг ижодий салоҳиятини оширишда иборат.

• Танлов иштирокчиларига қуйидаги мавзулар таклиф этилади:
• Музей ва она юртим тарихи
• Менинг севимли музейим
• Менинг музейга илк ташрифим
• Музей – менинг илхомим манбъаи
• Менинг севимли суратларим қаҳрамонлари
• Менинг севимли экспонатим

Танлов натижаларига кўра ҳакамлар ҳайъати икки ёш категориясида 6−7 ва 8−9-синф ўқувчиларидан ғолибларни танлаб олади.

Танлов уч босқичда амалга оширилади:

• 1-босқич – 15 апрелдан 15 майгача танловга иншоларни қабул қилиш. Иншолар Савицкий музейида қабул қилинади.
• 2-босқич – 15 майдан 25 майгача ғолибларни аниқлаш.
• 3-босқич – 25 май танлов ғолибларини ўзлари таълим олаётган мактабларда тақдирлаш.

Ғолиблар ҳамкорлар томонидан эсдалик совғалари билан тақдирланадилар.