«Бавария» 25 карра Германия чемпионига айланди

Германия Бундеслигасининг 2014/15 йилги мавсуми якунланишига 4 тур қолганида Мюнхеннинг «Бавария» клуби муддатидан олдин чемпионликни қўлга киритди, деб хабар беради «Sports.ru».

«Бавария» 30-тур ўйинини 25 апрель санасида ўтказиб, «Герта» устидан 1:0 ҳисобида ғалаба қозонди. Мюнхенликларнинг энг яқин таъқибчиси «Вольфсбург» 26 апрель куни Менхенгладбахнинг «Боруссия» клубига имкониятни бой берди. «Бўрилар» чемпионат тугашига 4 тур қолганда «Бавария»дан 15 очко қолиб кетган ҳолда олтин медалларни қўлга киритиш имкониятидан буткул маҳрум бўлишди. Шу тариқа, Хосеп Гвардиола шогирдлари муддатидан олдин чемпионга айланди.

Бу «Бавария» тарихидаги 25-чемпионлик унвонидир. Клуб 3 йилдан бери мамлакатда муддатидан олдин олтин медаллар масаласини ҳал қилмоқда. 2013/14 йилги мавсумида Мюнхен жамоаси 2-ўриндаги клубдан 19 очко, 2012/13 йилги мавсумда эса энг яқин таъқибчисидан 25 очко кўп тўплаган.

Германия чемпиони ушбу мавсумда «олтин требл»ни қўлга киритиши мумкин. Жамоа Германия ва Европа Чемпионлар Лигасининг ярим финалига чиққан. Европанинг клублар миқёсидаги энг нуфузли турнирининг ярим финалида «Бавария» «Барселона»га қарши майдонга тушади.