Google компаниясининг юқори мартабали вакили Дэниел Фрединбург Непалдаги кучли зилзила натижасида юз берган Эверестдаги қор кўчкиси қурбони бўлди. Бу ҳақда RBC.ru хабар бермоқда.
Фрединбург Эверестни забт этиш бўйича гуруҳ таркибида бўлган, унинг ўлими ҳақида экспедицияни ташкил қилган Jagged Globe компанияси сайтида хабар берилган.
Хабарда қайд этилишича, кўчки натижасида экспедициянинг яна икки аъзоси ҳаёт учун хавфли бўлмаган жароҳатлар олган. Фрединбургнинг ўлимини унинг ижтимоий тармоқлардаги аккаунтлари орқали синглиси ҳам тасдиқлаган.
https://twitter.com/danfredinburg/status/592032253473136640
Фрединбург 2007 йилдан бери Google’да ишлаб келарди. У Google X лабораториясидаги махфийлик масалалари учун масъул эди.
Маълумот учун, 25 апрель куни рўй беган, эпицентри Непал пойтахти Катмандудан 82 километр масофада жойлашган 7,4 магнитудали зилзила натижасида ҳалок бўлганлар сони 1,9 мингдан ошиб кетди.
Зилзила натижасида Катмандунинг тарихий марказидаги қатор бинолар бузилган. Шунингдек, Ҳиндистонда бир неча ўнлаб одам ҳалок бўлгани, Хитой ва Бангладешда ҳам қурбонлар борлиги айтилмоқда.
Зилзила оқибатида Эверестда қор кўчкиси рўй берди. Reuters’нинг хабар беришича, ҳозиргача Эверестда 18 нафар альпинистнинг жасади топилган.
Изоҳ (0)