Тошкент шаҳрида бир-бири билан пойга ўйнаган жамоат транспорти ҳайдовчилари ва ишга маст ҳолда чиққан чиптачи жазога тортилди, деб ёзади «Оила даврасида» газетаси.
Автобус йўловчисининг қайд этишича, дастлаб унга қўпол муносабатда бўлган чиптачи аёлда спирт ҳидини сезган, кейинги бекатда эса чиптачи тушиб, дўкондан спиртли ичимлик ва сигарет олиб чиққан. Йўловчи мактабларнинг 500 метр радиусида спиртли ичимлик сотиш мумкин эмаслигини, аммо бу дўкондан 100 метр узоқликда мактабга кўзи тушганини қайд этган.
Сўнгра автобус бирдан тезлашган, йўловчилар ҳайдовчи ён томондан келган бошқа автобус билан пойга ўйнаганига гувоҳ бўлган. Тезлик юқорилиги туфайли йўловчилардан бири йиқилиб тушган, бошқалари ҳам талофат кўрган, кўпчилик кейинги бекатдан тушиб қолган. Олд қатордаги йўловчи аёл ҳайдовчига танбеҳ берганда унга қўпол муносабатда бўлиб, қўл кўтармоқчи бўлган, бироқ бошқа йўловчилар бунга йўл қўймаган.
Хабар муаллифи эса Ягона интерактив давлат хизматлари порталининг алоқа марказига қўнғироқ қилиб, операторга бўлган воқеани сўзлаб берганини маълум қилган. Ўн кундан кейин унинг электрон почтасига «Тошшаҳартрансхизмат»дан келган хабарда пойгачи ҳайдовчилар ва ичувчи чиптачи айбига яраша жазо олгани айтилган.
Изоҳ (0)