Таэквондо бўйича Осиё чемпионатида Ўзбекистон терма жамоаси яна 4 та медални қўлга киритди

Хитой Тайпейида таэквондо WTF бўйича ўсмирлар, ёшлар ҳамда паратаэквондо бўйича Осиё чемпионати давом этмоқда, деб хабар берди «Olamsport».

Кадетлар ўртасида ўтказилган мусобақада ёшларимиз яна 4 та медалга эга бўлишди. -41 кг вазн тоифасида даянга чиққан ҳамюртимиз Мадина Маннопова кумуш медаль билан тақдирланди. Айнан шу вазнда иштирок этган вакилимиз Бекзод Ибрагимов, шунингдек, -33 кг вазнда Жасурбек Зокиров ҳамда -45 кило вазнда Абдулла Шомуродов бронза медалига сазовор бўлишди.

Эслатиб ўтамиз, Осиё чемпионатининг ўсмирлар ўртасидаги баҳсларида ҳамюртларимиздан 68 кг вазн тоифасида даянга чиққан Нигора Турсунқулова кумуш, 63 кг вазн тоифасида иштирок этган Пан Влада, 73 кг вазндаги Шаҳбоз Шофайзиев ҳамда 78 кг вазнда юртимиз спорт шарафини ҳимоя қилган Сайидолим Нуъмонов бронза медалига сазовор бўлишган эди. Демак, ҳозирча терма жамоамиз ҳисобида 2 та кумуш, 7 та бронза медали бор.