Буюк Британияда суд 20 март, жума куни ўспирин йигитни 22 йиллик қамоққа маҳкум этди, дея хабар бермоқда «РБК». У шериги билан бирга Лондонда ҳарбий хизматчининг бошини танидан жудо қилиш режасини тузганликда айбланди.

Янгигина мусулмонликни қабул қилган 18-ёшли Брастом Зиамани 2014 йил августида ҳибсга олинган. Унинг ёнидан қора байроққа ўралган 30 сантиметрли пичоқ ва болға топилган. Ҳибсга олинишидан бир неча соат аввал у собиқ севган қизига Британия пойтахти кўчаларида ҳарбийни бошидан жудо этиш режалари ҳақида гапириб берган.

Судья таъкидлашича, агар айбдор 19 августда қўлга олинмаганида, бир неча соатлар ичида у болға ва пичоқдан фойдаланиб, ўз ниятини амалга оширган бўларди, натижада Лондон кўчаларида даҳшатли ва ёввойи жиноят амалга оширилган бўларди.