17 март, сешанба куни Россия давлат думаси Борис Немцов хотирасига сукут дақиқасини эълон қилиб ўтирмади, дея хабар бермоқда ТАСС. Ялпи мажлисда кун тартибини муҳокама қилиш чоғида депутат Дмитрий Гудков бундай таклиф билан чиққан эди.
«Унинг фикрларини доим ҳам қўллаб чиқишмаган бўлса-да, унинг хотирасига беш дақиқалик сукут сақлаш инсонийлик бўлар эди, деб ўйлайман», — деди у.
Гудковнинг таклифи овозга қўйилмади. Палата спикери Сергей Наришкин депутатларга сиёсатчи ўлдирилган куни Немцовнинг қариндошларига телеграмма жўнатиб, бутун палата номидан ҳамдардлик изҳор этганини маълум қилди.
Эслатиб ўтамиз, Борис Немцов Москва вақти билан 27 февраль 23:15 да (Тошкент вақти билан 28 февраль 01:15 да) Москва марказидаги Москворецкий кўпригида отиб ўлдирилди.
Ички ишлар вазирлиги расмий вакили сўзларига кўра, Немцов қиз дўсти билан кўприкдан ўтаётган маҳал оқ рангли машинадан унга қарата олтита ўқ отилган. Шулардан тўрттаси мухолифатчига келиб теккан. Қотиллик чоғида сиёсатчининг ёнида бўлган қиз — 23 ёшли украиналик модель Анна Дурицкая ўз кўрсатмаларини бериб, ватанига қайтиб кетди.
1 март куни сиёсатчи аксилинқироз маршида иштирок этиши керак эди. Марш талаблари қаторидан Украина билан урушни зудлик билан тўхтатиш, мухолифатни телевидениега қўйиш, бюджетни марказлашмаган тизимга ўтказиш, ҳарбий харажатларни қисқартириш эвазига соғлиқни сақлаш ва таълимга сарф қилинадиган маблағни ошириш кабилар ўрин олган эди.
Изоҳ (0)