Ахборот технологиялари ва коммуникациялари соҳаси мутахассислари учун бўш иш ўринлари ярмаркаси ташкил этилади
2015 йилнинг 13 март куни Тошкент ахборот технологиялари университетининг спорт мажмуасида, шунингдек университетнинг ҳудудий бўлинмаларида, ҳудудларда жойлашган Ахборот технологиялари ва коммуникацияларини ривожлантириш вазирлиги тизимидаги касб-ҳунар коллежларида ахборот-коммуникация технологиялари мутахассислари учун бўш иш ўринлари ярмаркаси ташкил этилади. Бу ҳақда Ўзбекистон Республикаси Ахборот технологиялари ва коммуникацияларини ривожлантириш вазирлиги ахборот хизмати хабар берди.
Фото: uztelecom.uz
Тадбирдан кўзланган мақсад соҳа компания ва ташкилотларига, мамлакатимизда мазкур йўналишда мавжуд бўш иш ўринларига АКТ соҳасидаги кадрларни жалб этиш имкониятини яратиш, шунингдек ёш мутахассисларга ишга жойлашишларига кўмаклашишдир.
Ярмаркада ахборот технологиялари ва коммуникациялари соҳасида фаолият юритувчи 50 дан зиёд корхоналар, шунингдек давлат органлари бўш иш ўринлари билан қатнашадилар.
Ярмаркада иш изловчи сифатида ТАТУ ва унинг ҳудудий бўлинмалари билан бирга, соҳанинг 74 нафар касб-ҳунар коллежлари битирувчилари ҳам қатнашишлари мумкин.
Шунингдек, ярмарка 13 март куни – бир вақтнинг ўзида юртимиздаги барча ҳудудларда қуйидаги манзилларда ташкил этилади:
Самарқанд: ТАТУнинг Самарқанд филиалида
Фарғона: ТАТУнинг Фарғона филиалида
Қарши: ТАТУнинг Қарши филиалида
Урганч: ТАТУнинг Урганч филиалида
Нукус: ТАТУнинг Нукус филиалида
Андижон: Андижон ахборот технологиялари касб-ҳунар коллежи
Наманган: Наманган транспорт ва ахборот технологиялари касб-ҳунар коллежи
Бухоро: Жондор ишлаб чиқариш, транспорт ва алоқа касб-ҳунар коллежи
Жиззах: Жиззах шаҳридаги транспорт ва алоқа касб-ҳунар коллежи
Навоий: Навоий информатика ва электрон ишлаб чиқариш касб-ҳунар коллежи
Термиз: Термиз ахборот технологиялари ва маиший хизмат кўрсатиш касб-ҳунар коллежи
Изоҳ (0)