Ўзбекистон Миллий кутубхонаси «Истиқбол» ўқиш залида «Она азиз, аёл мўътабар» номли китоб-расмли кўргазма очилди. Бу ҳақда кутубхонанинг расмий сайтида хабар берилди.
Кўргазмада она меҳрини, аёл латофати ва садоқатини тараннум этувчи фотосуратлар ва китоблар ҳавола этилган. Кўргазмада Президент Ислом Каримов томонидан Аёллар йили деб эълон қилинган 1999 йилда чоп этилган «Аёлга эҳтиром» деб номланган китоб алоҳида ўрин эгаллаган. Мазкур китобга жасоратли оналар, меҳнаткаш аёллар, фан, маданият ва спорт фидоийларининг оилавий, ижтимоий ва жамоатчилик фаолиятлари ҳақида мақолалар, очерклар, ҳикоялар, шеърлар ва расмлар киритилган.
Шунингдек, бу ерда Зулфия, Гулчеҳра Жўраева, Турсуной Содиқова, Зулфия Мўминова, Марҳабо Каримова, Хуршида каби ўзбек шоиралари ва ўзининг бетакрор ва гўзал сатрларини нозик ҳилқат вакилларига бағишлаган шоирлар шеърий тўпламлари мужассам.
Кўргазмага ташриф буюрган фойдаланувчилар «Хотин-қизлар энциклопедияси» билан танишиб, унда ўзларини қизиқтирган барча саволларга жавоб топади.