«Навоий» халқаро аэропортидан иккита Boeing-767-300 юк самолёти мунтазам парвозларни бошлади

Жорий йилнинг 3−4 мартидан «Ўзбекистон ҳаво йўллари» Миллий авиакомпанияси иккита юк ташувчи Boeing-767-300 VSF самолётларининг мунтазам эксплуатациясини бошлади, деб хабар бермоқда Миллий авиакомпания расмий сайти. Бу, ўз навбатида, Миллий авиакомпания юк ташувлари ривожи тарихида янги босқичдир.

Ушбу юк ташувчи самолётлар Uzbekistan airways technics авиакорхонасида C-chek формадаги тўлиқ техник хизматдан ўтказилиб, бўёқдан чиққандан сўнг «Навоий» аэропортига жўнатилди. Самолётларнинг тижорий юкланиши 53 тоннани ташкил қилади. Boeing-767-300 эксплуатацияси Халқаро логистика маркази фаолияти ривожида муҳим ўрин тутади.

Таъкидлаш жоизки, ушбу жараёнга Миллий авиакомпаниянинг Учувчилар мажмуаси Boeing учув отрядида катта таёргарлик кўрилди. Юк ташув қатновларини бажарувчи учувчилар МАК Ўқув – машқ марказида махсус таёргарликдан ўтдилар.

3 март куни Навоий-Деҳли йўналишида биринчи қатнов, 4 март куни эса, Навоий-Дубай йўналишида иккинчи самолётда парвозлар амалга оширилди. Ушбу юк самолётларини МАК учувчилари – отряд командири ўринбосари Т.Файзуллаев, учувчи-йўриқчиси Б.Нарходжаев, ҳаво кемалари командирлари Г.Романова Р.Турабов ҳамда иккинчи учувчилар М.Мирхайдаров ва М.Вахабовлар бошқардилар.

«Ўзбекистон ҳаво йўллари» Миллий авиакомпанияси 29 мартдан бошлаб ёзги навигацияга ўтиши муносабати билан «Навоий» аэропортидан Амстердам, Шанхай ва Мумбай янги йўналишларида мунтазам юк қатновлари амалга оширилади. Boeing-767-300 юк самолётлари 7 та йўналишда ҳафталик, яъни бир ҳафтада 15 та қатновни бажаради: Деҳлига бир ҳафтада – 3, Дубайга – 3, Франкфуртга – 2, Тянзинга 1 марта, Амстердам, Шанхай, Мумбайга эса бир ҳафтада 2 мартадан парвозлар бажарилади. Шунингдек ушбу самолётларда қўшимча чартер қатновлари ҳам режалаштирилган.

Эслатиб ўтамиз, авиакомпаниянинг иккита Boeing йўловчи самолётларини юк ташувчи ҳаво кемаларига қайта жиҳозлаш лойиҳаси ҳукуматимиз кўмаги асосида амалга оширилди. Жаҳон стандарти ва талабларига жавоб берувчи замонавий юк ҳаво кемалари паркининг яратилиши «Навоий» аэропорти базасидаги Халқаро логистика маркази ривожида узига хос босқич сифатида МАК юк ташувлари фаолияти самарадорлигини оширишда ҳам муҳим қадам ҳисобланади.