Тошкентлик қўшиқчи Сардор Милано (Сардор Ишмухамедов) «Россия-1» канали ташкил этган «Главная сцена» («Асосий саҳна») лойиҳасининг ярим финал босқичига чиқди. Лойиҳада унга россиялик таниқли мусиқий продюсер Константин Меладзе устозлик қилмоқда, деб хабар беради «Kun.uz».

Сардор чорак финалда Энио Морриконенинг «Nella fantasia» композициясини ижро этиб, ҳакамлар олқишига сазовор бўлди.

«Агар бу йигит танлов ғолибига айланса, унга ёрдам берганим учун мен ҳам ўзимни ғолиб сезаман ва бундан фахрланаман», – деди унинг продюсори Виктор Дробиш.

«Мен Сардордан ҳам кўпроқ ҳаяжонландим. Лекин унинг ўзи фантастик ижро этди. Бизда яхши жамоа шаклланган», – деди унга устозлик қилаётган Константин Меладзе.

Сардор эса саҳнадан тушганидан сўнг, рақамига жўнатилган минглаб хабарларга дош бера олмасдан телефони ўчиб қолгани ҳақида гапириб, уни қўллаб-қувватлаган барчага миннатдорчилик билдирди.

https://www.youtube.com/watch?v=jxf-IXTkzvk

Сардор Ишмухамедовнинг ижодий йўли «Аладдин» болалар студиясида (Тошкент) бошланган. Сўнгра у фортепиано бўйича Театр коллежида, 2010 йилдан эса Гнесин номидаги Москва мусиқа билим юртида таҳсил олган.

Қўшиқчининг қобилияти халқаро танловларда муносиб баҳоланган: Сардор 2004 йил Қрим ва Олма-Отада бўлиб ўтган халқаро танловлар Гран-приси соҳиби, 2011 йил Москвадаги «Бородино-Холле»да ўтказилган «Новая волна-2011» халқаро танлови саралаш босқичининг ярим финалчиси, Россияда ўтказилган «Евровидение-2012» танловининг финалчиси ҳисобланади. У, шунингдек, Алла Пугачёванинг «Фактор А» лойиҳаси саралаш босқичининг финалига чиққан. 2013 йилда Витебскда ўтказилган «Славянский базар» халқаро фестиваль-танловининг дипломанти бўлди.

Қўшиқчи яқин йилларда АҚШга бориб, у ерда магистратурада мусиқа бўйича таҳсил олишни режалаштирмоқда. 10 йилдан кейин эса у Россия Давлат Кремль саройида уч кунлик концерт дастурлари тақдим қилишни орзу қилади.