Россияда кибержосусликдан ҳимояланган TaigaPhone смартфони ишлаб чиқилди
Наталья Касперскаянинг InfoWatch компаниясига тегишли Taiga System МЧЖ кибержосусликдан юқори даражада ҳимоя қилинган смартфон ишлаб чиқди, деб ёзади «РБК». Хитойда ишлаб чиқариладиган TaigaPhone қурилмаси фақат корпоратив мижозлар учун мўлжалланган.
Компания эгаларидан бири Алексей Нагорний айтишича, қурилмадан ҳеч қандай маълумот — на фотосуратлар, на ҳужжатлар, на телефон суҳбати ва на жойлашган жой ҳақидаги ахборот — фойдаланувчи рухсатисиз чиқиб кетмайди.
Смартфон Android базасида ишлайди, платформа қайта ишланиб, Taiga деб ном олди. Нагорний сўзларига кўра, фойдаланувчилар тизимнинг баъзи компонентларини мустақил равишда ўчириб қўйиши мумкин бўлади. «Масалан, фотокамерани ёки жойлашган жойни аниқлаш функциясини ўчириб қўйиш мумкин. Ёки уни фақат қўнғироқлашиш мумкин бўлган ‘ғишт’ телефонга айлантириш мумкин», — дея аниқлик киритди у.
