Тошкентдаги 1378 та автобусга GPS ускуналари ўрнатилди

Тошкентда ҳаракатни масофадан назорат қилиш тизимини навигация тизимлари ва махсус алоқа воситалари асосида жорий этиш лойиҳаси амалга оширилмоқда. Бу ҳақда Ўзбекистон Республикаси Молия вазирлиги матбуот хизмати маълум қилди, деб хабар бермоқда «Podrobno.uz».

2500 комплект GPS-треккер ва GPS/GSM-антенналарни олиб келиш учун Orient Finance Bank’дан 1,1 миллиард сўм миқдорида кредит олинган. Лойиҳанинг биринчи босқичида Meitrack Group чет эл компанияси билан 126,8 миллион сўм қийматга эга 300 та GPS-треккер импорти бўйича шартнома тузилган. Иккинчи босқичда эса Meitrack Group 289,2 минг долларлик 2200 та GPS-треккерни етказиб берган.

Ускуналарнинг катта қисми 2014 йил ноябрь ойида Тошкентга етиб келган. Ҳозиргача GPS-треккер ва GPS/GSM-антенналар Тошкентда 127 йўналиш бўйича ҳаракатланувчи 1378 та автобусга ўрнатилган. Натижада бекатларда техника тўхтаб туришига йўл қўймаслик эвазига 1,2 миллиард сўмдан ортиқ маблағ тежаб қолинган.

Бундан ташқари, автобусларни реал вақтда кузатиш учун 30 та компьютер ва 16 та девор монитори билан жиҳозланган янги марказий диспетчерлик маркази тузилган. Тизимнинг ишлашини яхшилаш учун электрон харита ва йўловчи йўналишлари паспортларини яратиш, шаҳар йўловчи транспортининг иши бўйича GPS тизими ёрдамида олинган ҳисоботларни таҳлил қилиш бўйича махсус ишчи гуруҳлар тузилган.