Ўзбекистон миллий терма жамоаси бугун, 21 январь куни режага асосан белгиланган машғулотларни давом эттирди. Машғулотлар Мельбурндаги Lake Side Stadium стадионида кечди, деб хабар берди «Uff.uz».
Футболчилардан Сервер Жепаров, Одил Аҳмедов ва Акмал Шораҳмедов индивидуал тарзда шуғулланди. Қолган футболчилар эса умумий гуруҳда машғулот олиб борди.
Жасур Ҳасанов ва Сардор Рашидов эса алоҳида кўрсатма бўйича ҳаракат қилди: қолган футболчилар уларга узоқдан тўпни ошириб берди. Улар эса икки қанотдан кучли зарба билан тўпни жарима майдончасига йўллади.
Лутфулла Тўраев ва Санжар Турсунов, асосан, ўзаро тўп билан муомала қилди. Мураббийлар штабининг уларга алоҳида кўрсатмалар берганидан кўриниб турибдики, улар эртанги ўйинда майдонга тушиши мумкин.
Машғулот ўтаётган стадионда хорижий мухбирлар деярли кўринмади. Машғулотларни, асосан, Ўзбекистондан келган журналистлар кузатиб борди. Шунингдек, мусобақа ташкилотчилари ҳам шу ерда бўлди.
Машғулотларни кузатиш жараёнида Темур Кападзенинг ҳаракатлари эътиборни тортди: у жуда фаол ҳаракат қилди. Майдонни соғингани сезилиб турди. Айниқса, унинг зарбалари ва узатмалари кучли ва аниқ чиқди.
Шунингдек, футболчилар жарима майдончаси ёнида жарима зарбаларини ижро этишни машқ қилди. Бундан ташқари, қанотлардан узатиб берилган тўпларни бош билан дарвозага йўллаш машқи ҳам сайқалланди.
Майдонда Шавкат Муллажонов, Азиз Ҳайдаров ва Виталий Денисов ҳам индивидуал тарзда шуғулланди. Улар, асосан, пайларни чиниқтириш машқларини ўтади.
Футболчиларнинг кайфиятлари аъло даражада. Миржалол Қосимов, Шуҳрат Мақсудов ва Бахтиёр Ашурматов ҳар бир футболчи билан индивидуал тарзда суҳбатлашиб чиқди ва уларга топшириқларни берди. Машғулотлар кўтаринки руҳда ўтди.
Изоҳ (0)