Қашқадарёда ходимларнинг 7 миллион сўмдан ортиқ маблағини ўзлаштирган порахўр амалдор олти йилга қамалди
2014 йилнинг 22 апрелида бўлиб ўтган суд жараёнида 2013 йил 10 февралидан буён Қашқадарё вилояти ғазначилик бошқармаси бошлиғи вазифасида ишлаб келган шахснинг қилмишларига яраша жазо берилди, деб хабар қилмоқда «Ҳуқуқ» газетаси.
Хизмат мавқеидан фойдаланиб, мулкий наф кўришни мақсад иқлиб олган мазкур шахс жойлардаги бўлим бошлиқларини алмаштириш, бир тумандан бошқасига ўтказиш ёки ишдан бўшатиш, ишга қабул қилиш ўзининг хизмат ваколатига кирмаслигини, бу иш тўғридан-тўғри Ўзбекистон Республикаси Молия вазирлигининг мутлақ ваколати эканлигини билгани ҳолда, жорий этилган қонунларга зид ҳаракат қилди.
Жумладан, у Муборак тумани ғазначилик бўлими бошлиғидан шу мақсадларда 2013 йил апрель ойида 100 доллар, ўша йилнинг июлида 200 доллар, октябрида 300 минг сўм миқдорида пора олиб турган. 2013 йилнинг 20 ноябрида эса 500 долларни пора сифатида олаётганда ҳуқуқни муҳофаза қилувчи органлар томонидан қўлга олинган.
Суд ҳужжатларида келтирилишича, у ғазначилик бошқармаси хазиначиси билан тил бириктирган ҳолда 2013 йил март−октябрь ойларида қатор дам олиш кунларини иш куни деб эълон қилиб, бошқарма номидан буйруқ чиқариб Қарши шаҳар, Деҳқонобод, Қамаши, Косон, Китоб, Муборак, Касби, Чироқчи ва бошқа туманларнинг ғазначилик бўлимлари қатор ходимларига ёзилган маошларни ўзлаштириб олган.
Моддий манфаатдорликнинг бундай ғайриқонуний йўлини қўллаган шахс мансаб мавқеини суистеъмол қилиб, туманлардаги ғазначилик бўлимларида меҳнат қилаётган 38 нафар ходим ҳисобидан 7 миллион 412 минг сўмни ўзлаштиради. Судда у бу қилмишларини қисман тан олиб, енгиллик беришни сўраган.
Жиноят ишлари бўйича вилоят суди 2014 йил 22 апрель куни айбланувчини 3 йил моддий жавобгарлик ва мансабдорлик вазифаларида ишлаш ҳуқуқидан маҳрум қилди ва унга нисбатан 6 йил муддатга озодликдан маҳрум қилиш ҳамда энг кам ойлик иш ҳақининг 500 баравари миқдорида жарима жазоси тайинланди.
Шу билан бирга, суд, инсонпарварлик тамойилларини ҳам назарда тутиб, Ўзбекистон Республикаси Конституциясининг 21 йиллиги муносабати билан эълон қилинган амнистия актига асосан, тайинланган жазонинг ўталмай қолган муддатини учдан бир қисмга қисқартириш юзасидан ўз ҳукмини эълон қилди.
