АҚШ Саудия Арабистонида блогер ва ҳуқуқ муҳофазачиси Раиф Бадавига нисбатан чиқарилган 10 йиллик қамоқ ва 1 минг дарра қамчи жазоси ҳақидаги ҳукм ваҳшиёна деб ҳисоблайди. Бу ҳақда АҚШ давлат департаменти расмий вакили Жен Псакига таяниб, ТАСС хабар берди.
Унинг сўзларига кўра, қироллик Бадавини «сўз ва дин эркинлиги ҳуқуқидан фойдалангани учун» жазолаган. «АҚШ ҳукумати Саудия Арабистони ҳукуматини ушбу шафқатсиз жазони бекор қилиб, Бадави иши ва ҳукмини қайта кўриб чиқишга чақиради», — деди Псаки кундалик брифинг чоғида.
Шу билан бирга, у журналистларнинг Саудия Арабистони ҳукмни амалга оширса, Вашингтон қандай чора кўриши ҳақидаги саволларига жавоб бера олмади.
Изоҳ (0)