Яқинда Бухоро вилояти божхона бошқармаси «Олот» чегара божхона комплекси ходимлари томонидан божхона қоидабузарликларини содир этган «тадбиркорлар»нинг қинғир қилмишларига чек қўйилди, деб хабар бермоқда Бухоро вилояти божхона бошқармаси Ахборот хизмати.
Жумладан, Бирлашган Араб Амирликларидан Ўзбекистонга кириб келган чет эл фуқароси бошқарувидаги юк автомашинасига ортилган контейнер амалдаги тартибларга мувофиқ кўздан кечирилганда, унга ортилган товарлар билан юк-кузаутв ҳужжатларида қайд этилган товарлар бир-биридан мутлақо фарқ қилиши аниқланди.
Ҳужжатларга асосланилса, самарқандлик хусусий тадбиркор номига мазкур контейнерда асосан қурилиш материаллари юборилиши керак эди. Аммо, контейнер комплексдаги катта ҳажмдаги юк автомашиналарини назоратда ўтказишга мўлжалланган Rapiscan Eagle M60 русумли мобил инспексион-текширув аппаратидан ўтказилганда, унинг ичида идишларда суюқлик маҳсулотлари борлиги намоён бўлди.
Юк-кузатув ҳужжатларидаги маълумотларга нисбатан шубҳа уйғонгани сабабли контейнер очилиб божхона кўригидан ўтказилганда ҳужжатларда кўрсатилган товарлардан фақатгина «гранит тоши» товари борлиги, боз устига у ҳам қайд этилган миқдордан салкам 6 тонна кам эканлиги, ҳужжатларда номлари кўрсатилган бошқа товарлар эса контейнерда умуман мавжуд эмаслиги аниқланди. Уларнинг ўрнига эса ҳужжатларда кўрсатилмаган, умумий қиймати 737 млн. сўмдан ортиқ бўлган 115 номдаги товар-моддий бойликлари борлиги аниқланди.
Шунингдек, мазкур комплекс ходимлари томонидан Бирлашган Араб Амирликларидан кириб келган чет эл фуқароси бошқарувидаги яна бир юк машинаси мобил инспексион-текширув аппаратидан ўтказилганда, унга ортилган товар-моддий бойликлар билан юк-кузатув ҳужжатларида қайд этилган товарлар ўртасида тафовутлар борлиги божхоначиларда шубҳа уйғотди.
Ўрнатилган тартибда ўтказилган божхона кўриги давомида эса шубҳалар ўз тасдиғини топди. Қаранг-ки, юк машинасига ортилган қиймати 611 млн. сўмдан, оғирлиги эса 26 тоннадан ортиқ бўлган товар-моддий бойликлар ҳеч қандай ҳужжатларсиз республикамизга олиб киришга уринилган экан.Ҳозирда ушбу ҳолатлар юзасидан божхона текширувлари ва суриштирув ҳаракатлари давом эттирилмоқда.
Рақамларга мурожаат қилсак, жорий йилнинг ўтган даври мобайнида Бухоро вилояти божхона бошқармаси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда 1168 та божхона қоидабузарликлари аниқланган бўлиб, натижада қиймати 7 млрд. сўмдан ортиқ сўмлик товар-моддий бойликлар давлат эгалигига ўтказилган.
Изоҳ (0)