Ўзбекистон ампутантлар терма жамоаси Мексикадаги Жаҳон чемпионатининг ярим финалига чиқа олмади

Мексикада бўлиб ўтаётган ампутантлар ўртасидаги жаҳон чемпионатида ярим финалчилар номи маълум бўлди. Афсуски, Ўзбекистон терма жамоаси чорак финалда кутилмаганда 0:1 ҳисобида Анголага ютқазиб қўйди, деб хабар бермоқда «Кун».

Африкаликлар томонидан танланган тактика уларга ғалаба келтирди. Ўйиннинг 21-дақиқасида олис масофадан урилган голга Ўзбекистон вакиллари жавоб қайтара олмади (ўйин 25 дақиқадан икки тайм давом этади). Шу тариқа, сўнгги учта Жаҳон чемпионатида ғолибликни қўлга киритган Ўзбекистон бу сафар «тахт»ни топширадиган бўлди.

Россия терма жамоаси Бразилияни 4:0 ҳисобида мағлуб этган бўлса, Туркия ҳам Гаити устидан йирик ҳисобда (3:0) зафар қучди. Польша терма жамоаси Аргентинани мағлуб этиб (2:1), ярим финалга чиқди. Ярим финалда Ангола — Туркия, Россия — Польша ўйинлари ўтказилади.

Ўзбекистон терма жамоаси ва чорак финалда ютқазган бошқа жамоалар 5—8-ўринлар учун баҳс олиб боради.

Эслатиб ўтамиз, Ўзбекистон терма жамоаси вакиллари чемпионат давомида Украинани (10:0), Ирландияни (6:1), Бразилияни (4:0) ва Францияни (3:0) мағлуб этган эди.