Тошкент шаҳрида жойлашган Мультимедиа умумтаълим дастурларини ривожлантириш марказида «Бошланғич синфларда инглиз тилини ўқитиш» мавзусида давра суҳбати бўлиб ўтди. Халқ таълими вазирлиги ҳамда Ўзбекистондаги Британия Кенгаши ҳамкорлигида ташкиллаштирилган тадбирда турли вазирлик ва идора вакиллари, умумтаълим мактаблари раҳбарлари ва чет тили ўқитувчилари иштирок этди. Бу ҳақда Ўзбекистон Республикаси Халқ таълими вазирлигининг расмий сайтида хабар берилди.
Анжуманда сўзга чиққанлар Президент Ислом Каримовнинг «Чет тилларни ўрганиш тизимини янада такомиллаштириш чора-тадбирлари тўғрисида»ги қарори асосида олиб борилаётган ишлар ва янгиликлар хусусида алоҳида тўхталиб ўтди. 3-синф ўқувчилари учун нашрга тайёрланаётган Kids’ English дарслиги муаллифлари ўқув қўлланманинг қулайлик ва афзалликлари ҳақида фикр билдирди. Шунингдек, давра суҳбатида бошланғич синфларда инглиз тилини ўқитишнинг самарали усуллари, педагогларнинг узлуксиз касбий малакасини ошириш, ўқувчилар билимларини баҳолаш мезонини ўрганиш масалалари таҳлил этилди.
«Ўқув қўлланма Республика таълим маркази, Абдулла Авлоний номидаги халқ таълими ходимларини қайта тайёрлаш ва малакасини ошириш марказий институти, ЎзДЖТУ ҳузуридаги чет тилларни ўқитишнинг инновацион методикаларини ривожлантириш республика илмий-амалий маркази мутахассислари тавсиялари асосида такомиллаштирилмоқда», — деди Kids’ English дарслиги муаллифи Лутфулло Жўраэв.
Инглиз тили ўқитувчиларига дарсликдан унумли фойдаланиш, машғулотларни юқори савияда ташкил этиш бўйича мутахассислар томонидан керакли тавсиялар берилди. Иштирокчилар ўзаро фикр алмашиб, ўзларини қизиқтирган саволларга жавоб олди.
Изоҳ (0)